Maiatzaren 18an (igandea) Museoen Nazioarteko eguna da. Donostiako museoek jarduera desberdinak prestatu dituzte egun hau ospatzeko “Museoen etorkizuna etengabe aldatzen ari den komunitateetan” lelopean. Animatu eta hurbildu zaitez Donostiako museoetara!

Ospakizunarekin batera, maiatzaren 17 eta 18an museorako sarrera doakoa izango da egun osoan zehar eta eskaintza berezia antolatu da: taldeko sormen-ariketak, bisita gidatuak eta musika-emanaldiak.

Egin klik hemen programazio osoa ikusteko edota proposatutako jardueraren baterako erreserba egiteko.

Museoen Nazioarteko eguna ospatzeko eta aurtengo leloari jarraituz, erakusketa batean ikusten ez dena, hau da, erakusketa egiteko prozesua, erakutsi nahi dute Euskal Itsas Museoan maiatzaren 17an.

11:00etan (EUSK) eta 12:00tan (CAS)

– Mare Clausum bista: erakusketa honek historiatik bidai bat egiten du gaur egungo egoerari erantzuna bilatu nahian; Museoek iragana ez ezik gizartearen gaur egungo egoerari ere begiratu behar diotela aitortuz.

11:30ean

– Portura begira familia tailerra: Museoen etorkizuna birpentsatzeko argazkigintza tailer honen bidez, haurrek Donostiako portuarekiko daukaten ikuspegia azaldu eta Donostiko itsas-historiaren ardatz den leku honen inguruan hausnarketa sustatu nahi da. 

Jarduera guztien aurretiko izen-ematea nahitaezkoa izango da eta Museoaren web orriaren bidez edo 943430051 telefonora deituz egingo da

Informazio gehiago eta erreserbak

Maiatzaren 18an museoko sarrera doakoa izango da. Museoen Nazioarteko Eguna ospatzeko, Sagardoetxeak egitarau berezia eskainiko du: 12:00etan antzerkia Astigarragako Antzerki Eskolako ikasleen eskutik Sagardoetxeako sagastian. Ondoren, “Udaberri giroan” tailerra izango da Astigarte Elkarteakin, sagastiko materialak zein norberak margotutako marrazkiak (loreak, erleak, erlauntzak… ) erabilita, Sagardoetxeako sagarrondoak udaberriko elementuekin apaintzeko aukera izango dute bisitariek.

Aldez aurretik izena ematea derrigorrezkoa izango da eta 943550575 telefonora deituz edo info@sagardoetxea.eus helbidera idatziz egingo da.

Maiatzaren 18an Chillida Lekuk herritar guztiak gonbidatzen ditu museoa deskubritzera familientzako doako bisita gidatuak eskainiz.

Museoko hezitzaileek haur eta familiei zuzenduriko bisita gidatua egingo dute, euskaraz eta gazteleraz. Bertan, haurrek, heldu batek lagunduta, eskulturak ikutu eta Chillidak sortutako espazioak arakatu ahal izango dituzte, formen mundu infinituan murgilduz.

Euskarazko bisita gidatua: 12.00etan
Gaztelerazko bisita gidatua: 16.00etan

Aldez aurretik izena ematea derrigorrezkoa izango da

Informazio gehiago