Surfa praktikatzea gustatzen bazaizu, Zurriola hondartza zure paradisua izango da. Zurri deitzen diote donostiarrek etengabeko olatu-festa horri, eta mundu osoko surflariak heltzen dira egunero hara itsasoaz eta inguruko giroaz gozatzeko.
Izan ere, taula eskuan doazen surflariez gain, maiz topatuko dituzu familia osoak paseatzen, baita lagun-taldeak Sagueseko horman ilunabarraz gozatzen ere. Halaber, donostiar asko ikusten dira bizikletan, korrika, saskibaloian jolasten eta skate taula baten gainean. Grosen, kirola eta hondartza eskutik doaz.

Hondartzaren amaieran, Ulia mendiaren azpian, Sagues dago. Eseri hango horman eta gozatu Donostiako ilunabar ikusgarrienetako batez.
Han ere hiriko eskulturarik enblematikoenetako bat aurkituko duzu: Bakearen Usoa, Nestor Basterretxearena, elkarrizketak eta hitzak indarkeriaren gainetik duten boterea sinbolizatzen duena.
Saguesetik erraz iris zaitezke Ulia mendira, Donostiako hiru biriketako batera. Hango bidezidorretatik ibili eta itsaslabarrak inguratzea esperientzia oso ezohikoa da hiri baterako.

Kostaldetik paseatu ondoren, sar zaitez Grosen bihotzean, hango benetako esentzia ezagutzeko. Peña y Goñi eta Zabaleta oinezkoen kaleek auzoaren bizitza islatzen dute, eta pintxo-taberna eta terraza ugari dituzte. Katalunia Plaza, bere parke eta zuhaitzekin, jendearen topagune da, halaber. Grosen hiriko lokal modernoenetako batzuk daude eta jendez betetzen da, batez ere ostegunetan, pintxopote ospetsuan. Gainera, erosketen paradisua da: tokiko diseinatzaileen boutiquetan, arte-galerietan eta surfeko jantzien dendetan, gustu guztietarako aukerak daude.

Gros ezin hobeto konektatuta dago hiriaren gainerakoarekin. Erdialdetik oinez irits zaitezke, Kursaaleko zubia zeharkatuz, edo, garraio publikoan, autobuseko 14 linean edo trenean, aldiriko geltokian geratzen baita.