Aiete auzoak naturarekin duen lotura du bereizgarri; hain justu, paseatzeko eta erlaxatzeko berdegune ezin hobeak ditu. Aiete Parkean, frantses estiloko lorategiak aurkituko ditugu, baita beltxargak, ahateak, haitzulo bat eta ur-jauzi bat dituen urmaela ere, ingurune lasai eta zuhaizti batean. Bestalde, Miramon Parkea dugu, hiriko handienetako bat, zeinak natura eta kultura uztartzen baititu. Gainera, Puio Parkeak, hain ezaguna ez izan arren, hiriaren eta itsasoaren bista panoramikoak ditu, eta toki perfektua da deskonektatzeko eta paisaiaz gozatzeko. Parkeoi esker, Aiete naturazaleentzako toki pribilegiatua da.

Miramon Parke Teknologikoa Donostiako eremurik garaienean dago, eta erreferentea da berrikuntzan eta garapenean. Eremu horretan 140 enpresa baino gehiago daude, biozientzien, IKTen eta ingeniaritzaren sektoreetakoak. Parkeko instalazioetan nabarmentzekoak dira Zientziaren Museoa, familia-bisitetarako ezin hobea, eta Donostia Ospitalea, erreferentziazko osasun-zentroa. Guztira 600.000 m² baino gehiagoko azalera du Miramonek, eta abangoardiako teknologia eta ingurune naturalaren edertasuna uztartzen ditu.

Aietera iristeko gomendatzen dizugun aukeretako bat oinez tipi-tapa igotzea da, Kontxako hondartzaren paretik parkeraino ematen duen bidetik, Aldapetatik, alegia. Bidean gora zoazela, badiaren ikuspegi zoragarriak izango dituzu.

Garraio publikoa nahiago baldin baduzu, berriz, 19, 31, 35 eta B2 hiri-autobusek Aieteraino eramango zaituzte hiriko hainbat tokitatik.

Miramonera iristeko, berriz, 35, 17 edo 28 autobusak hartu beharko dituzu. Gogoratu Mikeletegi pasealekuaren 12aren parean jaisteaz eta Miramongo parkea oinez zeharkatzeaz, merezi baitu txoko guzti-guztiak gozatzea.