Egunez egun, Euskal Herriko txoko guztiak zeharkatuko ditu, herriz herri, kilometroz kilometro, euskararen aldarria lau haizetara zabalduz.

Aurtengo Korrikak Euskara Gara leloa darama, euskara gizarte osoa batzen duen elementu gisa ulertzen delako, ez hesi gisa, bultzada eta topagune gisa baizik.

Euskarak denok bilduko gaitu, euskara ez baita muga, arnasa baizik. Euskara zubi gisa landu behar da. Euskal herritar guztion hizkuntza komuna izan dadin nahi dugun heinean, kohesio sozialerako tresna ere izango da.

Zirraragarria da ikustea nola beti, gau eta egun, goiz, arratsalde edo ilun, kilometro bakoitzean, errepide bazterrean, norbait lekukoaren zain dagoen. Elur edo haize, euri edo eguzki, hotz edo bero, euskararen aldeko ekimenak ez du trabarik, beti doa aurrera, oztopo guztien gainetik.

Hunkigarria da Korrika norberaren herrira iristen den unea, haur, gazte, heldu eta zahar, denak lekukoa hartu eta hurrengoari pasatzeko prest, denok nahi dugu lagundu, denok parte hartu, eta gure hizkuntza bultzatu. Bakoitzak bere alea jarrita, elkarrekin gauza ederrak egin ditzakegunaren adibide da Korrika.