CIMASUB Donostiako Itsaspeko Zinemaren Nazioarteko Zikloak 50. urteurrena ospatuko du aurten. Jaialdia azaroaren 12tik 14ra egingo da Antzoki Zaharrean, eta mende erdi darama ozeanoen edertasuna eta aniztasuna herritarrei hurbiltzen eta haiek kontserbatzearen garrantziaz kontzientziatzen. Hitzordu honek planetako itsasoetan barrena bidaia zoragarri batez gozatzeko aukera eskainiko digu, itsaspeko irudi ikusgarriak, itsas bizitzari buruzko istorio harrigarriak eta ingurumen-kontzientzia sustatzeko mezuak uztartuz.

Donostiako Itsaspeko Zinemaren Nazioarteko Zikloak 50. edizioa ospatuko du, zinema, argazkilaritza, hezkuntza eta ingurumen-sentsibilizazioa uztartzen dituen programazio berezi batekin. Real Sociedadeko Urpeko Jardueren atalak antolatuta, Jaialdiak doako hiru saio eskainiko ditu, Brontzea, Zilarra eta Urrea izenekoak, egunero 19:00etan, Antzoki Zaharrean. Bertan, Estatuko eta nazioarteko zinemagileen 22 ikus-entzunezko lan proiektatuko dira, ozeanoen aberastasuna eta biodibertsitatea erakusteko, baita haien kontserbazioak dituen erronkak ezagutarazteko ere. Azken jardunaldian, azaroaren 14an, larunbatean, lehiaketako 100 argazki onenen aukeraketa bat erakutsiko da, jaialdiaren aitzindariei omenaldia egingo zaie eta sariak banatuko dira.

Programazioa itsaspeko argazkilaritza-erakusketekin osatuko da, hiriko hainbat gunetan, hala nola Aquariumean, Garberan eta Kirol Etxean (Anoetako Estadioan). Horrez gain, Txikiziklo Submarino ekimena ere egingo da Aquariumean, ikasleei zuzendutako hezkuntza-jarduera.

Donostiako ospakizunen ondoren, CIMASUBek 50. urteurreneko programazioarekin jarraituko du Bilbon (Itsasmuseum), azaroaren 21ean eta 22an, eta Gasteizen (Florida zinema-aretoetan), azaroaren 23an, 26an eta 30ean, itsaspeko zinemaren proiekzio eta argazki-erakusketa berriekin.

50. ediziora iristea mugarri aparta da 70eko hamarkadan sortu zenetik milaka ikusleri ozeanoen edertasuna, hauskortasuna eta sekretuak hurbildu dizkien jaialdi honentzat, argazkilaritzaren, zinemaren eta itsaspeko esplorazioaren bidez. Horregatik, antolatzaileek aurtengo kartelak edizio hain bereziaren izaera bisualki islatzea nahi izan dute.

Azken edizioetan ez bezala, jaialdiaren irudi ofizialean itsaspeko argazkilaritza izan baita protagonista, aurten lengoaia grafiko guztiz desberdina aukeratu dute. Iker Ayestaran ilustratzaile donostiarrak sortutako irudian, 70eko hamarkadako ekipamendua daraman urpekari klasiko bat ageri da, garai hartako itsaspeko kamera batekin. Irudi horren bidez, omenaldia egiten zaie gaur egungoak baino baliabide askoz mugatuagoekin itsaspean murgildu ziren aitzindariei, gaur egun urpekaritzaren memoria kolektiboaren parte diren argazkiak eta filmaketak egitera ausartu zirenei. Baina omenaldia harago doa. Irudiak, halaber, duela berrogeita hamar urte CIMASUB sortzea bultzatu zuten Real Sociedadeko Urpeko Jardueren ataleko kide guztiei egin nahi die aitortza. Itsasoarekiko grina zuten pertsona ameslari haiek, Donostian itsaspeko zinemari eta argazkilaritzari eskainitako gune bat sortzearen aldeko apustua egin zuten, eta bost hamarkadaz bizirik iraun duen eta nazioarteko erreferente bihurtu den proiektu baten hazia erein zuten.

Kontsultatu egitaraua hemen: https://ciclo.subacuaticasrealsociedad.com/eu-programa

Oharra
Gonbidapenak egunean bertan jaso ahal izango dira: goizean, Victoria Eugenia Antzokiko leihatilan (11:00etatik 13:30era), eta arratsaldean, Antzoki Zaharreko leihatilan, 16:30etik saioa hasi arte (gehienez 3 sarrera pertsonako).