Aurten bere 10. ediziora helduko da Glad is the Day jaialdia, eta inoiz baino energia gehiagorekin dator hitzordua. Egunez ospatzen den doako musika jaialdi berezi hau 2016an jaio zen, Donostia, Kulturaren Europako Hiriburu izendatu ondoren. Ordutik, egun honetan Cristina Enea parkera gerturatzen direnak, musika-aniztasuna bereizgarri duen programa batean murgiltzen dira urtero.

Abuztuaren 2an, igandean, 12:00etatik 21:00etara, Cristina Enea parkea berriro ere jatorri oso desberdinetako talde eta artistaz beteko da. 7 talde igaroko dira Stage Nagusitik —agertoki nagusitik, alegia—, eta elektronikari, hip-hopari eta soinu urbanoei lotutako 8 emanaldi arduratuko dira Hondamen Sonikoa izeneko agertokia dantzan jartzeaz. Gau partean, asteburua luzatu nahi dutenentzat, DJak izango dira Le Bukowskin eta Dabadaban.

Jaialdi gaztea izan arren, Glad is the Day donostiarrok maitasun bereziz hartzen dugun jaialdia da. Baliteke parkean sortu ohi den giroaren eraginez izatea; izan ere, deigarria da bertaratzen den publikoaren aniztasuna: gazteak, familiak, musikazaleak, auzoko bizilagunak… Denek dute tokia musika ona eta lehen mailako ingurune naturala uztartzen dituen festa honetan.

Izan ere, Glad is the Day jaialdian, Cristina Enea parkea bera bihurtzen da ospakizunaren erdigune. Aipatutako parkea era guztietako kultur jarduerez gozatu ahal izateko ezin hobeto diseinatuta dago. Bere kokapenari eta historiari esker, toki bikaina da ezaugarri horiek dituen jaialdia egiteko.

Glad is the Day jaialdiko musika askotarikoa izan ohi da: cumbia, trapa, indiea edota musika elektronikoa izango dira entzungai. Azken musika-estilo horrek, gainera, bere agertoki propioa izango du: “Hondamen Sonikoa” deritzona. Bertan arituko dira Estatu osotik iritsitako 8 DJ.

Musikaz gain, Glad Is the Day jaialdian azoka erakargarri bat ere egongo da artisautzari eta modari eskainitako 65 bat posturekin. Bertan, besteak beste, vintage arropa edo bertako artistek egindako sormen-lanak topatu ahal izango dituzu. Merezi du xarma berezia duten produktuz betetako dendatxo iragankor horiei bisita egiteak.

A! Eta haurrentzako eta familia osoarentzako jarduerak ere egongo dira!

Glad is the Day-n parketik nahi bezainbeste aldiz ateratzeko eta itzultzeko aukera duzunez, kontzertu baten eta bestearen artean Cristina Eneako parke basotsu honetan buelta bat egitea gomendatzen dizugu. Zeharka ezazu eta ezagutu bertako txoko berezienetako batzuk: obaloa, urmaela, Cristina Enea Finka… Cristina Enea parkeak istorio ederra du atzean ezkutatuta eta Mandasko Duke-Dukesak, Fermin eta Cristina, garai bateko jabeak, dira horren protagonistak.

Egia auzoak ere gauza asko ditu eskaintzeko! Egia auzo bizia eta nortasun handikoa da. Kultura, musika, natura eta artea bateratzen dira bertan.