Udako hilabeteetan, Donostia aire zabaleko doako jaialdien agertoki bihurtzen da. Nahiago duzu hondartzako hondar gainean oinutsik ibili, edo zuhaitz baten gerizpean etzanda musikaz gozatzen duzun horietakoa zara? Aukeratu hobekien datorkizun plana.
Jazzaldia
Uztailaren 22tik 26ra bitartean, Zurriolako hondartzak doako zortzi kontzertu hartuko ditu Jazzaldiaren barruan. Horien artean, nabarmentzekoak dira emakumeen lidergoa duten nazioarteko lau izar (LP, Danielle Nicole, Ibibio Sound Machine eta Emma-Jean Thackray) eta tokiko lau talde sendo (ETS, Kokoshca, Nøgen eta HOFE). 61. ediziora heldu den jazz jaialdi hau klasiko bat da dagoeneko, bai bertakoentzat eta baita egun horietan hiria bisitatzen dutenentzat ere. Nazioarteko programazio zabala eskaintzen du, hondartzako doako kontzertu ugarirekin, eta bere kartel nagusian, besteak beste, Pat Metheny, Diana Krall eta Samara Joy izarrak nabarmentzen dira aurten.
Argazkia: Donostiako Jazzaldia
Glad is the Day
Abuztuaren 2an, igandean (12:00-21: 00), hondartzatik Cristina Enea Parkeko zuhaitzen gerizpera lekualdatuko gara Glad is the Day doako jaialdiaz gozatzeko. Hainbat agertokitan banatutako musika emanaldiez gain, jaialdiak DJ saioak, artisautza eta arropa azoka, piknik-guneak eta haurrentzako programazioa eskainiko ditu.
Argazkia: CC BY-SA Donostia Kultura – Glad is the Day 5# 2019
Ba al zenekien jaialdi honen izena Gladys del Estal ekologista donostiarraren omenez egindako hitz-joko batetik datorrela? Glad is the Day ingelesetik dator eta “Egun zoriontsua!” gisa itzul daiteke.
Ezin ahaztu, bestalde, Donostiako Aste Nagusia, hiriko festa handia!
Ezin ahaztu, bestalde, Donostiako Aste Nagusia, hiriko festa handia!
Aste Nagusia
Abuztuaren 8tik 15era bitartean, Donostiako Aste Nagusia ospatuko da, adin eta publiko guztientzako hamaika jarduerarekin: portutik abiatu eta Kontxako hondartzan lehorreratzen den piraten abordatzea, su artifizialen lehiaketa tradizionala, hiri osoan eskaintzen diren doako kontzertuak (besteak beste, Veintiuno, Sanguijuelas del Guadiana, Süne, Lia Kali edo Etzakit talde eta artistak izango dira gurean), etab.
Argazkia: Donostia San Sebastián Turismoa
Euskal Jaiak
Iraileko lehen egunetan (irailak 2-13), Kontxako Banderarekin (estropadak) bat eginez, Donostiak bere Euskal Jaiak ospatzen ditu, euskal folklorea, herri-kirola eta tokiko sagardo ekoizleak (Sagardo Eguna) ardatz dituen jarduera-programa batekin.
Argazkia: Donostia San Sebastián Turismoa
Boga Boga Festibala
2026ko irailaren 10etik 13ra bitartean, hiriko eta inguruetako leku enblematiko eta berezietan egiten den tokiko DNA duen musika independentearen jaialdiaren laugarren edizioa hartuko du Donostiak. Aurten, Boga Bogaren agertokiak Miramar Jauregian, Easo Plazan eta Dabadaban egongo dira.
Boga Boga Festibalaren 2026ko kartel ofiziala
